Orri Steinn Óskarsson framherji Real Sociedad og íslenska landsliðsins er klár í slaginn gegn Wales í Þjóðadeildinni á föstudag. Íslenska liðið kom saman í gær fyrir heimaleiki gegn Wales og Tyrklandi.
Orri Steinn hefur verið að venjast nýju liði á Spáni en hann var keyptur til Sociedad í lok ágúst fyrir rúma 3 milljarða króna.
„Tvö góð lið, skemmtilegir leikir á heimavelli. Væri geggjað að fá eins marga stuðningsmenn og hægt er, mér fannst við gera marga góða hluti í síðasta verkefni. Það er fullt af hlutum í leiknum sem mér fannst við bæta, maður fann að stuðningurinn heima var góður. Vonandi koma sem flestir að styðja við okkur,“ segir Orri Steinn í samtali við 433.is.
Orri segir mikilvægt fyrir íslenska landsliðið að nýta sér Laugardalsvöllinn og það forskot sem hann getur gefið.
„Við verðum að nýta heimavöllinn, mér finnst við hafa yfirhöndina á heimavelli og við verðum að nýta það. Þetta er leikur sem við þurfum að vinna ef við ætlum okkur eitthvað í þessari keppni
„Við komum saman í gær og æfingin í dag var góð, það er fullt af hlutum sem við erum að vinna með. Við tölum um litlu hlutina þegar líður á vikuna.“
Um nýtt líf á Spáni segist Orri njóta þess í botn að vera á nýjum stað og spila í einni sterkustu deild í heimi.
„Þetta er auðvitað öðruvísi en Danmörk, mikið af hlutum sem maður þarf að venjast. Það er búið að vera krefjandi, mér finnst ég hafa komist á gott ról innan vallar. Við spilum á þriggja daga fresti og lítið æft, maður þarf að læra inn á liðið og taktík í leikjum.“
„Ég hafði góðan tíma til að hugsa hvort þetta væri það sem ég vildi, ég hefði aldrei tekið þetta skref ef ég vissi að ég væri ekki tilbúinn. Það var geggjað að skora tvö mörk á móti Valencia, losna aðeins við pressuna.“
Orri segir að það hafi verið mögnuð upplifun að skora fyrstu mörkin. „Völlurinn var klikkaður og stemmingin geggjuð, þetta var það sem manni dreymdi um þegar maður var lítill.“
Orri var ónotaður varamaður í síðasta leik en segist meðvitaður um að það geti tekið tíma að festa sig í sessi. „Maður þarf að átta sig á því að maður er tvítugur, stundum þarf maður að vera þolinmóður. Ég er að reyna að vera þroskaður, maður vill sigra heiminn strax en stundum tekur það lengri tíma.“
