Arnar Þór Jónsson, lögmaður og fyrrverandi forsetaframbjóðandi og varaþingmaður Sjálfstæðisflokksins, mun ekki ganga í Miðflokkinn. Þess í stað ætlar hann að stofna nýjan stjórnmálaflokk eins og hann hafði áður tilkynnt um.
Mbl.is greinir frá þessu.
Segir Arnar Þór að hann hafi rætt við formanninn Sigmund Davíð Gunnlaugsson og þingmanninn Bergþór Ólason í sumar. Þeir hafi óskað eftir tillögum og hugmyndum sem hann lét þeim í té en fékk síðan engin viðbrögð. Viðræðurnar hafi fjarað út.
Vegna þessa hyggst Arnar Þór stofna flokk með áherslu á að örva hagvöxt, draga úr sköttum og skrúfa fyrir útgjöld í loftslagsmálum, útlendingamálum og útþenslu ríkisins.
