Um er að ræða leik í 2. umferð undankeppni Sambansdeildarinnar. Skoska blaðið The National fjallar í dag um leikinn og mikinn áhuga stuðningsmanna St. Mirren á honum. Þar kemur fram að búist sé við 3-400 stuðningsmönnum St. Mirren á Hlíðarenda annað kvöld.
Í umfjöllun blaðsins kemur þó einnig fram að það hafi ekki gengið hnökralaust fyrir sig að komast til Íslands fyrir stuðningsmenn skoska liðsins. Fá bein flug eru milli landanna og rauk miðaverð upp er ljóst varð að St. Mirren væri á leið til Íslands. Stuðningsmenn finna sér þó leiðir og eru dæmi um að fólk fljúgi í gegnum Dusseldorf, Amsterdam, Búdapest og Riga.
Sá sem lagði á sig lengsta ferðalagið fyrir leikinn gegn Íslandi er Colin Bright, en hann er mættur hingað til lands. Hann starfaði eitt sinn við það að vera í hlutverki lukkudýrs St. Mirren en fyrr á þessu ári flutti hann til Ástralíu. Hann stoppaði þó nokkra daga á Ítalíu á leið sinni til Íslands.
Colin starfar enn fyrir St. Mirren og hjálpar til að mynda við að skipuleggja viðburði á leikdögum. Hann hefur verið duglegur að birta efni frá Íslandi síðan hann mætti hingað til lands í gær. Hann hrósaði því til að mynda hversu þægilegt væri að fara í gegnum Keflavíkurflugvöll, en varaði fólk við því að rútuferðir þaðan tækju óratíma. Kappinn er búinn að skella sér í Bláa lónið og einnig heimsækja N1-völlinn, heimavöll Vals. Leist honum ansi vel.
Stephen Robinson er þjálfari St. Mirren og er hann brattur fyrir leiknum á morgun, en hann býst við hörkuleik.
„Það er erfitt að bera saman íslenska og skoska boltann. Það sem við vitum er að þeir eru með mjög góða leikmenn og stærsta stjarnan er auðvitað Gylfi Sigurðsson,“ sagði hann meðal annars um andstæðinga morgundagsins.
https://t.co/KvvfkNmak2 pic.twitter.com/Fm4rxnWDTW
— Paisley Panda (@PandaC1987b) July 23, 2024
Meira efni Colin frá Íslandi má sjá með því að smella á nafnið hans á hlekknum
