Hinn finnski Herra Lordi, eða Tomi Putaansuu, stofnandi hljómsveitarinnar Lordi sem sem vann Eurovision árið 2006 er ekki par hrifinn af nýjum rokklögum sem hafa verið í keppninni. Ekki einu sinni lagi Maneskin sem vann.

„Ég kann að meta og virði þau lög sem ég hef heyrt þarna. En þau fara öll inn um annað og út um hitt eyrað,“ sagði Herra Lordi í viðtali við tímaritið Metal Hammer.

Lordi færðu Finnlandi sinn fyrsta og eina sigur í Eurovision með slagaranum Hard Rock Hallelujah. Það er eina þungarokkslagið sem hefur unnið keppnina.

Þó að Eurovision sé aðallega þekkt fyrir popptónlist slæðast rokklög annars lagið með. Meðal annars lag Maneskin, Zitti E Buoni, sem vann keppnina árið 2021 fyrir Ítalíu. Síðan þá hefur sveitin orðið heimsfræg.

Á meðal annarra rokklaga í Eurovision má nefna Dark Side með finnsku sveitinni Blind Channel, In My Dreams með hinum norsku Wig Wam og vitaskuld Valentine Lost með Eiríki Haukssyni.

Vantar húkkinn í viðlagið

Herra Lordi segist ekkert hafa á móti þessum sveitum. Þetta snúist um persónulegan smekk hans.

„Sjáið nú til. Ég ólst upp við að hlusta á KISS og Twisted Sister og heimurinn hefur breyst mikið síðan þá. Það er sjaldgæft að ég heyri eitthvað í líkingu við Twisted Sister í dag,“ sagði Herra Lordi.

Að sögn Herra Lordi þarf lag að hafa sterkan húkk í viðlaginu til að festast í höfðinu á honum.

„Því miður á það oft við í dag, sérstaklega í rokklögum í Eurovision, að lög hafa ekki viðlag sem festast í höfðinu á mér.“