Það var 1946 sem T Coronae Borealis sást síðast. Þetta er dvergstjarna í um 3.000 ljósára fjarlægð frá jörðinni. En nú ber svo við að hún verður sýnileg á næstunni, frá því nú og fram í september.

Stjörnufræðingar segja að á þessum vikum geti fólk séð svolítið sem það fái aðeins tækifæri til einu sinni á ævinni og ekki eru allir svo heppnir á lífsleiðinni.

Það sem um ræðir er hitakjarnasprenging sem átti sér stað á stjörnunni fyrir mörg þúsund árum. Ljósið frá henni verður sýnilegt hér á jörðinni á næstu vikum. Hér á norðurhveli jarðarinnar verður dvergstjarnan jafn björt og Pólstjarnan.

The Guardian hefur eftir Laura Driessen, hjá eðlisfræðideild Sydney háskóla, að stjarnan verði einnig mjög björt á suðurhveli jarðarinnar.

Stjarnan verður sýnileg á um 80 ára fresti í kjölfar hitakjarnasprengingar á yfirborði hennar. Stjarnan er svokallaður hvítur dvergur. Hún sogar til sín vetni frá nærliggjandi rauðum risa, sem er önnur tegund stjarna, og myndast þrýstingur við það sem endar að lokum með sprengingu.

Ljósið frá sprengingunni verður sýnilegt í um viku og er þá miðað við að horft sé héðan frá jörðinni með berum augum til himins.