Robert De Niro lét nokkur uppeldisráð falla í viðtali hans við Entertainment Tonight. Leikarinn á sjö börn og það yngsta er dóttirin Gia, sem er tveggja ára. Móðir hennar er Tiffany Chen, 45 ára. 

„Aðalatriðið er að styðja börnin sín. Svo lengi sem þau eru ekki að meiða sig, gera neitt skaðlegt eða neitt slíkt, þá verður þú að styðja þau punktur. Jafnvel þótt þú fallist ekki á það sem þau gera eða haldir að þau … þá verður þú að styðja þau. Og þau verða að vita að þú styður þau. Alltaf.“⁠

De Niro sagði yngstu dótturina einfaldlega gleðigjafa.

„Hún er tveggja ára núna, svo þegar þau eldast og eldast þá… skilurðu? En það er alltaf dásamlegt. Hrein gleði, hvað get ég sagt?“⁠

DeNiro hefur áður greint frá að hann standi ekki í bleyjuskiptum.

„Nei, nei, en ég gerði það áður,“ sagði hann við Sunday Times í nóvember 2024. „Ég ver morgnunum mínum í að horfa á [YouTuber fyrir smábörn] Ms. Rachel með henni og gef henni pela.“

„Ég geri mitt besta, það er allt og sumt,“ bætti hann við um uppeldi barna sinna. „Ég vona að þau verði hamingjusöm.“

Hann sagði einnig við Guardian að Chen sjái um „þungavinnuna“ þegar kemur að Giu.

„Það er eins og það er. Það er í lagi. Ég meina, ég geri ekki þungavinnuna,“ sagði hann í október 2023 og benti á að það að ala upp börn verði ekki auðveldara með tímanum. „Ég er þarna, ég styð kærustuna mína. En hún vinnur verkið. Og við höfum hjálp, sem er svo mikilvægt.“

Eldri börn De Niro eru á aldrinum 13- 57 ára: dóttirin Drena, 57 ára, og sonurinn Raphael, 48 ára, sem hann eignaðist með fyrrverandi eiginkonu sinni Diahnne Abbott; tvíburarnir Julian og Airyn, 29 ára, með fyrrverandi eiginkonu sinni Toukie Smith; sonurinn Elliot, 27 ára, og dóttirin Helen Grace, 13 ára, með fyrrverandi eiginkonu sinni, Grace Hightower.

Í apríl lýsti leikarinn yfir stuðningi sínum við dóttur sína Airyn eftir að hún kom út sem transkona.

„Ég elskaði og studdi Aaron sem son minn, og nú elska ég og styð Airyn sem dóttur mína,“ sagði hann við TMZ. „Ég veit ekki hvað málið er … ég elska öll börnin mín.“