Á meðan Elon Musk var í fyrirsvari fyrir sparnaðardeildina DOGE var niðurskurðarhnífnum beitt óspart á sviðum þar sem Musk taldi óþarfa eyðslu eiga sér stað. Eitt þessara sviða er stuðningur Bandaríkjanna við þróunarríki, „USAID“, en þar nemur niðurskurðurinn 80%.

Þetta eru margir milljarðar dollara sem  hefur verið hætt að veita í stuðning til þróunarríkja og hefur það að vonum vakið mikla athygli víða um heim. Á föstudaginn var Bono, söngvari írsku rokksveitarinnar U2, gestur í hlaðvarpinu „The Joe Rogan Experince“ (sem er vinsælasta hlaðvarp heims).

„Ég held að Bandaríkin séu viðkvæmari nú en nokkru sinni áður. Það er eins og Bandaríkin hafi glatað ást sinni á umheiminum. Ég held ekki að umheimurinn vilji glata ást sinni á Bandaríkjunum,“ sagði Bono og vísaði síðan í skýrslu þar sem segir að niðurskurðurinn hjá USAID hafi nú þegar kostað 300.000 manns lífið.

Hann sagði einnig að 50.000 tonn af mat, sem átti að gefa fátækasta fólki heims, hafi verið skilin eftir og séu nú að skemmast því starfsfólkið sem hafði umsjón með þessu hafi verið rekið.

Musk var ekki sáttur við að vera sagður bera ábyrgð á dauða 300.000 manns og birti myndband af ummælum Bono og skrifaði við: „Hann er lygari/bjáni. Enginn hefur dáið.“