Um klukkan 18 á fimmtudaginn sat Katherine Altagracia Guerrero De Aguasvivas, 31 árs, í bíl sínum við gatnamót á Winter Springs svæðinu í Flórída. Skyndilega gekk maður að bíl hennar og var hann með skammbyssu í höndinni.

Vitni, sem sat í bíl fyrir aftan bíl Katherine, tók þetta upp á myndband. Lögreglan í Seminole County segir að svo virðist sem maðurinn hafi sest inn í bílinn og neytt Katherine til að taka U-beygju.

Lögreglan fann Katherine fljótlega en því miður var hún látin. Bíllinn skíðlogaði þegar að var komið og tugur skothylkja var í honum að sögn UniLAD.

Það hefur vakið mikla athygli að lögreglan skýrði einnig frá því að skömmu áður en Katherine var myrt, hringdi hún í eiginmann sinn og sagðist óttast að einhver væri að elta hana.

Lögreglan furðar sig að vonum á því af hverju eiginmaðurinn hringdi ekki í lögregluna eða af hverju Katherine hringdi ekki í lögregluna.

En eiginmaðurinn er ekki grunaður um aðild að málinu og hefur verið samstarfsfús.

Lögreglan hefur handtekið 28 ára mann, Jordanish Torres-Garcia, og er hann grunaður um að hafa myrt Katherine.