Þrír lögreglumenn í Suður Karólínu í Bandaríkjunum hafa verið handteknir eftir að þeir tilkynntu að tilefnislausu, í alls fjórum smábæjum í ríkinu, um að þeir hefðu fundið lík.
CBS greinir frá þessu.
Lögreglumennirnir hafa verið ákærðir fyrir meðal annars óviðeigandi hegðun í starfi, samsæri um að fremja glæpsamlegt athæfi og óspektir. Þeir eru allir karlkyns og á þrítugsaldri.
Mennirnir hringdu alls fimm símtöl, á einum degi nánar tiltekið 4. febrúar síðastliðinn, í bæjunum fjórum og tilkynntu um líkfund. Annaðhvort hringdu þeir í verslanir í viðkomandi bæ eða í lögregluna. Allir bæirnir eru í umdæmi lögregluembættisins sem mennirnir starfa hjá.
Í hvert sinn kom lögreglan ásamt öðrum viðbragðsaðilum á vettvang en alltaf var niðurstaðan sú sama. Símtalið var gabb.
Ekki kemur fram hvað lögreglumönnunum gekk til með þessu athæfi sínu.
Embætti á vegum Suður Karólínu ríkis hefur málið til rannsóknar. Ekki er ljóst á þessari stundu hvort lögreglumönnunum hefur verið sagt upp störfum.
Íbúi í umdæminu segir það óneitanlega nokkuð sérstakt að lögreglumenn skuli hafa hagað sér með slíkum hætti. Það komi fyrir að meint neyðarsímtöl reynist vera gabb en almennt búist fólk ekki við því að lögreglumenn standi á bak við símtöl af því tagi.
