Áttatíu starfsmenn misstu í dag vinnuna hjá nýsköpunarfyrirtækinu Conrolant. Uppsagnirnar skýrast af samdrætti í Covid-19 tengdum verkefnum samkvæmt tilkynningu frá fyrirtækinu. Störfin eru þvert á deildir og starfsstöðvar félagsins sem eru í fimm löndum en fram kemur að dreifing og vöktun bóluefna vegna kórónuveiru-faraldursins hafi krafist mikils mannafla.
Áfram munu um 450 manns starfa hjá fyrirtækinu.
Þá kemur fram að Controlant hafi tryggt sér 80 milljóna Bandaríkjadala fjármögnun, sem samsvarar um 11 milljörðum íslenskra króna, til þess að styðja við áframhaldandi vöruþróun og markaðssókn.
Í tilkynningunni kemur fram að um sé að ræða 40 milljóna dala fjármögnun sem leidd var af Gildi-lífeyrissjóði með þátttöku annarra lífeyrissjóða ásamt einkafjárfestum og núverandi hluthöfum. Fjármögnunin kemur til viðbótar við 40 milljón dala lánsfjármögnun frá breska sjóðinum Apax Credit, sem lokið var í september síðastliðnum.
„Á sama tíma og vöxtur kjarnastarfsemi er sterkur og áhugi á lausnum félagins hefur aldrei verið meiri, mun umfang COVID verkefnisins minnka umtalsvert á næstu misserum. Til að mæta þeim samdrætti þurftum við að taka þá erfiðu ákvörðun að fækka starfsfólki þvert á svið félagsins. Við kveðjum góða samstarfsfélaga með trega en erum á sama tíma stolt af því sem við höfum áorkað saman,“ er haft eftir Gísli Herjólfssyni, forstjóri og einum stofnenda Controlant, í tilkynningunni.
