„Hafi mark­miðið með út­spili Sam­fylk­ing­ar­inn­ar síðasta mánu­dag verið að bjóða upp á skýra val­kosti á flokk­ur­inn langt í land,“ segir Óli Björn Kárason, þingmaður Sjálfstæðisflokksins, um hin svokölluðu „öruggu skref í heilbrigðis- og öldrunarmálum“ sem flokkurinn kynnti á mánudag.

Óli Björn skrifar grein í Morgunblaðið í dag þar sem hann segist hafa orðið fyrir töluverðum vonbrigðum.

„Í fal­leg­um 24 blaðsíðna bæk­lingi er lítið bitastætt og fátt nýtt. Eng­ar nýj­ar hug­mynd­ir eða til­lög­ur um breytt skipu­lag heil­brigðis­kerf­is­ins,“ segir hann meðal annars.

Lögð eru til fimm þjóðarmarkmið í bæklingnum: Að fólk fái fastan heimilislækni og heimilisteymi, farið verði í þjóðarátak í umönnun eldra fólks, fólk fái öruggt aðgengi að þjónustu óháð búsetu, heilbrigðisstarfsfólk fái meiri tíma með sjúklingum og að einkarekstur í heilbrigðisþjónustu verði á forsendum hins opinbera.

Í grein sinni segir Óli Björn að markmiðin fimm séu almenn og svo sjálfsögð að draga verði í efa að það finnist Íslendingur sem setur sig upp á móti þeim.

„Þjóðarmark­miðunum ætl­ar Sam­fylk­ing­in að ná með gam­al­kunn­ug­um aðferðum vinstrimanna; auka út­gjöld­in. Vinstri­menn mega varla sjá vanda­mál eða verk­efni án þess að bjóðast til að leysa þau með aukn­um út­gjöld­um. Og út­gjöld­in verða fjár­mögnuð með auk­inni skatt­heimtu,“ segir hann og bætir við að Samfylkingin boði hækkun ríkisútgjalda til heilbrigðismála á komandi árum um 1-1,5% af vergri landsframleiðslu.

„Þetta jafn­gild­ir 38 til 57 millj­örðum króna miðað við lands­fram­leiðslu síðasta árs. Auðvitað er forðast að tala um skatta­hækk­an­ir,“ segir hann og bætir við að Kristrún Frostadóttir hafi ekki lagt spilin á borðið þegar kemur að aukinni skattheimtu.  „Að „sam­ein­ast um að sækja tekj­ur“ hljóm­ar bet­ur en hækk­un skatta,“ segir hann.

Óli Björn játar að hann hafi orðið fyrir vonbrigðum með „öruggu skrefin“ sem Samfylkingin hefur boðað.

„Ég átti von á ít­ar­leg­um til­lög­um um breytt skipu­lag og fjár­mögn­un heil­brigðis­kerf­is­ins. Þær von­ir voru reist­ar á sandi. Sem sagt: Sam­fylk­ing­in er ekki að boða nýja stefnu – hvað þá nýja hugs­un – í heil­brigðisþjón­ustu. Þjóðarmark­miðin eru al­menn og sett fram þannig að all­ir geta tekið und­ir. Það eina sem ligg­ur fyr­ir er löng­un Sam­fylk­ing­ar­inn­ar til að auka út­gjöld til heil­brigðismála um tugi millj­arða á ári með því að taka stærri sneið af þjóðar­kök­unni.“

Óli Björn segir að lokum að það blasi við að á nýju kjörtímabili muni skattar og álögur á einstaklinga og fyrirtæki hækka verulega komist Samfylkingin í ríkisstjórn. Og líklega verði fyrirmyndin sótt til Reykjavíkurborgar.