Ríkisendurskoðun segir ófremdarástand vera á skilum ársreikninga sjóða og stofnana fyrir árið 2022 og ástandið versni ár frá ári. Stofnunin segist líta þetta „mjög alvarlegum augum og ekki hvað síst í ljósi þess að í nýjasta áhættumati Ríkislögreglustjóra vegna peningaþvættis og fjármögnunar hryðjuverka, sem gefið var út í mars 2021, er sérstaklega fjallað um sjóði og stofnanir sem starfa samkvæmt staðfestri skipulagsskrá og ófullnægjandi skil þeirra á ársreikningum síðustu ár.“
Í frétt á Vísi þann 8. september kemur fram að árlegur skilafrestur ársreikninga sjóða og stofnana til Ríkisendurskoðunar sé 30. júní. Aðeins 22 prósent þessara aðila hafi skilað ársreikningi innan skilafrests í ár.
Ríkisendurskoðun sjálf er hins vegar alls ekki með hreinan skjöld þegar kemur að lögbundnum skilum ársreikninga. Samkvæmt lögum átti einkahlutafélagið Lindarhvoll, sem fjármálaráðherra stofnaði 2016 til að sjá um úrvinnslu og ráðstöfun eigna upp á hundruð milljarða sem slitabú föllnu bankanna afhentu ríkinu sem stöðugleikaframlag, að skila ársreikningi til Fjársýslu ríkisins í síðasta lagi 31. mars síðastliðinn. Þeim ársreikningi var hins vegar ekki skilað fyrr en 30. ágúst, fimm mánuðum eftir lögbundinn skilafrest og innan við tveimur sólarhringum áður en Fyrirtækjaskrá hefði skellt 600 þúsund króna vanskilagjaldi á félagið.
Guðmundur Björgvin Helgason, ríkisendurskoðandi, skrifaði sjálfur undir ársreikning Lindarhvols athugasemdalaust. Umfang rekstrarins var mjög lítið og getur á engan hátt skýrt hvers vegna það dróst í fimm mánuði fram yfir lögbundinn skilatíma að skila ársreikningi Lindarhvols.
Raunar var fullt tilefni til að gera athugasemdir við ársreikning Lindarhvols vegna þess að skýringar við ársreikninginn stangast á við skýrslu stjórnar sem er meðfylgjandi honum og ekki verður betur séð en að fjárframlög ríkisins til Lindarhvols séu byggð á samningi milli félagsins og fjármálaráðuneytisins sem féll úr gildi í febrúar 2018, fyrir meira en fimm og hálfu ári.
Mögulega færi betur á því að Ríkisendurskoðun að líti í eigin barm og byrji á því að koma skikki á ársreikningaskil sem stofnunin ber beina ábyrgð á sjálf áður en hún fer að amast við skilum annarra. Trúverðugleiki Ríkisendurskoðunar í þessum efnum verður að teljast takmarkaður þegar stofnuninni sjálfri reynist um megn að skila jafnvel einföldustu ársreikningum innan lögbundins skilafrests og þegar reikningum er loks skilað kvittar stofnunin upp á reikninga sem engan veginn ættu að fara í gegn athugasemdalaust.
Eftir höfðinu dansa limirnir og því þarf líklega ekki koma á óvart þótt lögbundin skil ársreikninga séu í molum. Ríkisendurskoðun og fjármálaráðherra gefa línuna í þeim efnum.
