Í síðustu viku rann dagurinn upp sem marga hafði kviðið fyrir. Þá tók bann við útleigu rafskúta gildi í París. Þurftu fyrirtæki, sem stunda slíka útleigu, að fjarlægja rafskúturnar af götum borgarinnar.

The Guardian skýrir frá þessu og segir að París sé fyrsta evrópska höfuðborgin sem bannar útleigu á rafskútum.

Bannið byggist á niðurstöðu atkvæðagreiðslu meðal borgarbúa í vor. Þá greiddu 90%, þeirra sem greiddu atkvæði, atkvæði með því að banna útleigu rafskúta.

Borgarstjórnin hefur lofsamað þetta og sagt niðurstöðuna vera mikinn sigur fyrir beint lýðræði. En rétt er að hafa í huga að kosningaþátttakan var aðeins 7,5%.