Elliði Vignisson, bæjarstjóri Ölfuss, segir að afsögn Svandísar Svavarsdóttur, mat­vælaráðherra, sé það eina sem geti komið í veg fyrir að vantrauststillaga verði lögð fram gegn Svandísi á haustþingi, sú tillaga verði mögulega samþykkt og stjórnarsamstarfið springi í loft upp.

Þetta kemur fram í færslu Elliða á Facebook-síðu sinni þar sem hann leggur fram spá sína fyrir hinn komandi pólitíska vetur.

Morgunblaðið fjallaði um það í morgun að í ályktun flokkráðs Sjálfstæðisflokksins, sem fundaði um helgina, er fullyrt að Svandís hafi brotið lög með því að blása hvalveiðar af í sumar með litlum fyrirvara. Elliði lét til sín taka á fundinum en í umfjöllun Morgunblaðsins kemur fram að hann hafi uppskorið lófaklapp með því að spyrja Óla Björn Kárason, þingflokksformann Sjálfstæðisflokksins, um hvort að þingflokkurinn myndi verja Svandísi vantrausti ef slíkt tillaga kæmi fram. Óli Björn á að hafa vikið sér undan spurningunni með diplómatískum hætti og sagst vilja geta horft í spegil daginn eftir úrvinnslu málsins.

Í tilefni af umfjöllun Morgunblaðsins birti Elliði áðurnefnda spá á Facebook-vegg sínum segir hann tvær atburðarásir mögulegar. Annars vegar að ríkisstjórnin springi eða þá að þingflokkur Sjálfstæðismanna valdi hinum almenna flokksmanni gremju með því að verja Svandísi. Fylgi flokksins má muna sinn fífil fegurri og því ljóst að það mun reynast forystu flokksins þungbært að reita kjósendur sína til reiði.

Spáin hljóðar svo í frásögn bæjarstjórans

1. Umboðsmaður Alþingis kemst að því sem allir vita; ákvörðun Svandísar Svavarsdóttur um að banna hvalveiðar var ólögleg.
2. Sigmundur Davíð (eða einhver annar) flytur vantrausttillögu á Svandísi.
3. VG minnir á að þeir hafi varið Jón Gunnarsson vantrausti en XD bendir á að þar hafi ekki verið um lögbrot að ræða.
4. a. Vantraust verður samþykkt og ríkisstjórnin springur.
b. XD ver Svandísi vantrausti við mikla þykkju flokksamanna.Það eina sem ég tel að geti komið í veg fyrir þetta er að Svandís segi af sér áður en til vantrausts kemur.