Samkvæmt tilkynningu matvælaráðuneytisins hefur Svandís Svavarsdóttir matvælaráðherra tekið ákvörðun um að stöðva tímabundið veiðar á langreyðum fram til 31. ágúst næstkomandi.

Í tilkynningunni segir að eftirlitsskýrsla Matvælastofnunar um velferð hvala við veiðar á langreyðum hafi borist ráðuneytinu í maí 2023 en niðurstaða skýrslunnar er að aflífun dýranna hafi tekið of langan tíma út frá meginmarkmiðum laga um velferð dýra.

Matvælastofnun fól í kjölfarið fagráði um velferð dýra að meta hvort veiðarnar gætu yfirhöfuð uppfyllt markmið laga um velferð dýra. Álit fagráðsins barst matvælaráðuneytinu 19. júní og niðurstaða þess er að sú veiðiaðferð sem beitt er við veiðar á stórhvelum samræmist ekki lögum um velferð dýra.

Í ljósi þeirrar niðurstöðu segir ráðuneytið nauðsynlegt að fresta upphafi hvalveiðivertíðarinnar þannig að ráðrúm gefist til þess að kanna hvort unnt sé að tryggja að veiðarnar fari fram í samræmi við ákvæði laga um velferð dýra.

Svandís segir í færslu á Facebook-síðu sinni:

„Því er niðurstaða mín sú að nauðsynlegt sé að stöðva veiðarnar tímabundið meðan kannaðar eru mögulegar úrbætur og lagaleg skilyrði þess að setja frekari takmarkanir á veiðarnar. Markmið laga um dýravelferð eru í mínum huga ófrávíkjanleg. Ef atvinnugreinar geta ekki tryggt að starfsemi þeirra sé í samræmi við lög um velferð dýra þá eiga þær sér ekki framtíð.“

Ráðuneytið mun kanna mögulegar úrbætur og lagaleg skilyrði þess að setja frekari takmarkanir á veiðarnar á grundvelli laga um velferð dýra og laga um hvalveiðar á komandi mánuðum og leita álits sérfræðinga og leyfishafa í því skyni.

Það var mbl.is sem greindi fyrst frá þessari ákvörðun matvælaráðherra.