Stýrihópur á vegum Sorpu hefur lagt til að kirkjugarðurinn við Lindakirkju í Kópavogi verði minnkaður um einn hektara svo hægt verði að koma fyrir nýrri endurvinnslustöð við Arnarnesveg. Til að vega upp á móti þessu verði væntanlegur kirkjugarður í Rjúpnadal í Garðabæ stækkaður um einn hektara. RÚV greindi frá þessu.

Fréttir af þessum áformum hafa vakið athygli og umræðu og margir leggjast gegn þeim, þar á meðal samtökin Sorgarmiðstöð. Karólína Helga Símonardóttir, stjórnarformaður Sorgarmiðstöðvar, birtir áskorun til bæjarráðs Kópavogs á Vísir.is í dag. Þar segir:

„Allir þeir sem misst hafa ástvin, þekkja þá tilfinningu þegar taka þarf ákvörðun um hin hinsta hvílustað þeirra. Mörgum er þessi ákvörðun erfið, ber með sér erfiðan raunveruleika um síðasta andardrátt ástvinar þeirra og að eftir eru aðeins jarðneskar leifar. Það er í raun eitt af því fáa sem við getum gert fyrir látin ástvin okkar er að finna þeim góðan hvíldarstað og fyrir okkur sem syrgjum að þau muni fá að hvíla sína hinstu hvílu, á fallegum stað þar sem ríkir friður og ró.“

Karólína segir að þessi áform samrýmist ekki friðhelgi grafreita:

„Sorgarmiðstöð skorar á bæjarráð Kópavogs að hafna þessari hugmynd þar sem hún samræmist ekki friðhelgi grafreita, sbr. 6. gr. laga um kirkjugarða: Kirkjugarðar og grafreitir eru friðhelgir. Það er ekki leyfilegt að reisa mannvirki, starfrækja stofnanir eða reka fyrirtæki sem frá stafar hávaði eða ys við kirkjugarða.“

Karólína segir ennfremur:

„Með von og virðingu um að starfshópur Sorpu endurskoði tillögu sína og Bæjarráð Kópavogs standi saman og verji hinsta grafreit þeirra ástvina sem jarðsett eru í Lindakirkjugarði.“