The Guardian skýrir frá þessu og segir að samkvæmt núverandi kerfi séu börn skráð eins árs strax við fæðingu og á nýársdag ár hvert er einu ári bætt við aldur allra. Flestir landsmenn miða við þennan skráða aldur sinn þegar þeir ræða um aldur sinn eða skýra frá honum.
En annað kerfi er notað þegar kemur að því að ákveða hvenær fólk á að mæta til herþjónustu og hvenær það nær löglegum aldri til að drekka áfengi og reykja. Í því kerfi er miðað við að börn séu núll ára þegar þau fæðast en eins og í hinu kerfinu er einu ári bætt við aldur allra á nýársdag ár hvert.
En þar með er ekki öll sagan sögð því notast er við þriðja kerfið, alþjóðlega kerfið þar sem börn eru skráð núll ára við fæðingu og ár bætist við aldur þeirra á afmælisdegi þeirra en ekki nýársdegi.
En í júní verður hætt að nota þrjú kerfi og aðeins verður notast við eitt, að minnsta kosti á opinberum skjölum, þegar ný lög taka gildi. Samkvæmt þeim verður notast við alþjóðlegu aðferðina við skráningu aldurs.
Með þessu á að draga úr félagslegum- og hagrænum kostnaði vegna lagalegra og félagslegra ágreiningsmála auk ruglings vegna hinna mismunandi skráningaraðferða.
