Það hefur lengi legið í loftinu að Trump myndi bjóða sig fram á nýjan leik en hann hefur ítrekað látið að því liggja. Í nótt staðfesti hann síðan endanlega að hann sækist eftir að verða forsetaframbjóðandi Repúblikanaflokksins 2024.
Hann tilkynnti þetta á fréttamannafundi á heimili sínu í Mar-a-Lago í Palm Beach í Flórída.
„Til að gera Bandaríkin öflug á nýjan leik tilkynni ég nú um framboð mitt til forseta Bandaríkjanna,“ sagði hann á meðan viðstaddir réðu sér varla fyrir fögnuði.
Með þessari tilkynningu slær Trump því föstu að hann telur sig enn vera leiðtoga Repúblikana en sótt hefur verið að honum síðustu daga í kjölfar úrslita þingkosninganna í síðustu viku. Repúblikönum hafði verið spáð stórsigri í þeim en þannig fór það ekki.
Margir þeirra frambjóðenda sem Trump studdi náðu ekki kjöri en þeir áttu það margir hverjir sameiginlegt að þykja ansi öfgasinnaðir og taka undir lygar hans um að rangt hafi verið haft við í forsetakosningunum sem hann tapaði 2020.
„Ástandið í þessu landi er skelfilegt. Það er gert grín að okkur og það er litið niður á okkur. En það þarf ekki að vera þannig. Í kvöld gefum við Bandaríkjamönnum annan valkost,“ sagði hann og sakaði Joe Biden, núverandi forseta, um að hafa eyðilagt landið.
