Bergur Þorri Benjamínsson, varabæjarfulltrúi í Kópavogi, segir þörf á að sveitarfélög breyti reglum sínum varðandi þær heimildir sem heilbrigðiseftirlit sveitarfélaganna hafi til að bregðast við draslsöfnun íbúa, eins og til að mynda yfirgefin bílhræ, tjaldvögnum eða öðru dóti. Í aðsendri grein á Vísi segir Bergur Þorri að margir hafi upplifað að nágranninn safni ekki slíku drasli bara inn á sína lóð heldur leggi undir sig sameiginlegar lóðir við fjölbýlishús. Þá lýsir hann eigin reynslu af slíkri uppákomu.

„Til að byrja með er þessi söfnun að mestu saklaus. Bíll með bilaðri sjálfskiptingu mun komast á lappirnar, en síðan líða mánuðirnir og jafnvel árin og aldrei kemst blessaður bílinn á lappirnar aftur. Það er til fullt af fólki sem á marga bíla í misjöfnu ástandi en flest af því fólki geymir slíka hluti í iðnaðar eða öðru geymslu húsnæði eða á lokuðu svæði. En svo eru til þeir einstaklingar sem ekki láta nægja að angra næstu nágranna hvort sem þeir búa í einbýli eða fjölbýli, þeir einfaldlega dreifa draslinu sínu þar sem þeir finna laust svæði til. Til að mynda er búin að standa ónýt Toyota bifreið af undir gerðinni Aygo í á 3 ár á slíku svæði nálægt þar sem ég bý. Til að byrja með var bílinn sennilega „aðeins“ bilaður en fyrir um hálfu ári voru allar rúður brotnar í bifreiðinni. Hún er því hættuleg en samt sem áður situr hún á sínum bletti þó allir viti að hún sé aðeins efni í brotajárn. En það er alveg sama þó maður tuði í hausnum á sér „Aygo-you go“, því fleiri slíkar ryðbeyglur dúkka upp kollinum hér og þar öllum til ama,“ skrifar Bergur Þorri.

Hann vísar til ritdeilu Alfreðs Schiöth, framkvæmdastjóra Heilbrigðiseftirlits Norðurlands, en Alfreð svaraði Sunnu Hlín Jóhannesdótturbæjarfulltrúa á Akureyri  í grein sem birtist á Akureyri.net. Þar benti Alfreð á hversu takmarkað vopnabúr heilbrigðiseftirlitsins væri til að taka á slíkum málum og innleiða þyrfti reglubreytingar

Þar bendir Alfreð á ákveðna hluti sem ekki eru til í vopnabúri Heilbrigðiseftirlits en þyrftu að vera það.

„Sjálfur get ég tekið undir með þeim báðum og tel einbúið að Samband Íslenskra sveitarfélaga rýni reglur einstakra sveitarfélaga og komi með tillögur sem öll sveitarfélög geti þá innleitt. Vilji einstaka sveitarfélög ganga enn lengra og gera sitt umhverfi enn fallegra þá gætu þau sett viðbótar reglur í því sambandi. Ég tek það fram að ég styð eignarrétt einstaklinga alla leið. En ef þú hefur ekki pláss fyrir draslið þitt, ekki þvinga því þá upp á næsta nágranna eða bæjarbúa,“ skrifar varabæjarfulltrúinn.