Þrír leikir fóru fram í Lengjudeild karla í kvöld.
Fjölnir tók á móti Kórdrengjum. Leikurinn var nokkuð jafn til að byrja með en heimamenn tóku völdin smám saman þegar leið á fyrri hálfleikinn. Það fór svo að Reynir Haraldsson kom þeim yfir undir lok fyrri hálfleiks. Seinni hálfleikur var rólegur og stefndi í sigur Fjölnis. Kórdrengir sóttu þó í sig veðrið á lokamínútum leiksins og fundu jöfnunarmark á 90. mínútu. Það gerði Þórir Rafn Þórisson. Lokatölur 1-1.
Fjölnir er í þriðja sæti deildarinnar með sjö stig. Kórdrengir eru í því sjöunda með fimm stig.
HK og Afturelding mættust þá í Kórnum. Heimamenn voru betri aðilinn í fyrri hálfleik og kom Stefán Ingi Sigurðarson þeim yfir undir lok hans. HK var áfram betri aðilinn í síðari hálfleik og fór langleiðina með að klára leikinn á 77. mínútu þegar Valgeir Valgeirsson skoraði. Lokatölur urðu 2-0.
HK er í fimmta sæti með sex stig. Afturelding er í því tíunda með tvö stig.
Loks tók Selfoss á móti Þrótti Vogum og vann öruggan sigur. Gonzalo Zamorano skoraði eina mark fyrri hálfleiks eftir stundarfjórðungs leik og kom heimamönnum yfir. Hann tvöfaldaði svo forystuna með marki á 64. mínútu. Selfoss komst í 3-0 þegar stundarfjórðungur lifði leiks en þá skoraði Gary Martin. Alexander Vokes skoraði svo fjórða markið undir lok leiks. Lokatölur 4-0.
Selfoss er á toppi deildarinnar með tíu stig. Þróttur er í því ellefta með eitt stig.
