Breska sjónvarpsstjarnan Lauren Harries var ósátt við athugasemd karlmanns um aldur hennar í raunveruleikaþættinum „Naked Attraction.“

Þátturinn er sýndur á bresku sjónvarpsstöðinni Channel 4. Í stuttu máli gengur þátturinn út á að það eru sjö keppendur. Einn er fullklæddur og hinir sex eru naktir. Nöktu keppendurnir eru í eins konar klefa og klæddi keppandinn fær bara að sjá hluta af líkamanum, fyrst fær hann að sjá fætur og kynfæri, hann velur síðan hvaða keppendur komast áfram í næstu umferð og þá fær hann að sjá aðeins meira af líkömum þeirra. Þannig gengur þetta koll af kolli þar til aðeins tveir naktir keppendur standa eftir. Þá þarf hann sjálfur að afklæðast og velur með hverjum hann langar á stefnumót. Þau fara þó fullklædd á stefnumótið.

Lauren var meðal nöktu keppendanna og var annar keppandinn til að vera sendur heim. Það var ekki endilega það að vera send heim sem fór fyrir brjóstið á henni, heldur ástæðan fyrir því.

„Ég er að leita eftir einhverri til að vera með til langtíma, og ég held að þú gætir verið aðeins of gömul fyrir mig,“ sagði Rigby, fullklæddi keppandinn.

Rigby var 27 ára og Lauren var 41 árs þegar þátturinn var tekinn upp.

Lauren neitaði að faðma Rigby þegar hann bauðst til þess og sagði: „Láttu mig í friði. Nei.“

„Þú hefðir geta fengið allt þetta góða en þú færð það ekki núna, því þú færð aldrei bakhliðina mína […] Ég ætla að fara, ég vil ekki vera í kringum hann.“

„Aldrei segja svona við konu,“ sagði þáttastjórnandinn við Rigby.

„Þú átt eftir að vera svo fúll út í þig sjálfan þegar þú áttar þig á því hver ég er, og þú átt líka eftir að vera fúll því þú ert ekki með mér, þannig svona er þetta bara.“

Lauren sagðist vera stolt trans kona og væri stolt af sér fyrir að koma fram í þættinum og sýna nákvæmlega hver hún er.