Vigdís Hauksdóttir, oddviti Miðflokksins í borgarstjórn, hefur ákveðið að gefa ekki kost á sér í komandi bæjar- og sveitarstjórnarkosningunum. Í kveðju til stuðningsmanna sinna sem Vigdís birtir á Facebook segir hún að kjörtímabilið sem senn er lokið hafi verið mjög krefjandi:

„Ég hef flett ofan af fjármálasukki í fjölda málaflokka í borgarrekstrinum án nokkurra afleiðinga fyrir borgarstjóra og meirihlutann.

Í öðru lagi er fjárhagsstaða Reykjavíkur komin langt yfir hættumörk. Skuldirnar eru stjarnfræðilegar og áætlað er að þær verði 240 milljarðar í árslok 2026. Þar af er búið að skuldsetja næsta kjörtímabil upp á 92 milljarða samkvæmt lántökuáætlun. Það er sérlega ósvífið.

Í þriðja lagi þá hefur viðhald skólahúsnæðis verið ófullnægjandi og grunnskólabörn eru á hrakhólum út um alla borg. Ekki hefur verið staðið við uppbyggingu leikskóla og borginni er haldið í heimatilbúnum lóðaskorti sem leiðir til fasteignaverðs í hæstu hæðum.

Í fjórða lagi bendir ekkert annað til þess en að borgarstjóri ætli sér að halda völdum með einhverjum útfærslum að nýjum viðreistum meirihluta eins og í kosningunum 2014 og 2018.“

Metur Vigdís stöðuna svo að gagnrýni hennar á rekstur borgarinnar fái ekki hljómgrunn og engra breytinga sé að vænta.

Pistilinn má lesa í heild með því að smella á tengilinn hér að neðan.