Vladimir Pútín, forseti Rússlands, sendi umheiminum ógnvænleg skilaboð í ræðu sem sjónvarpað var í dag. „Hver sá sem reynir að hindra okkur eða þess þá heldur ógnar landinu okkar, fólkinu okkar, ætti að vita að viðbrögð Rússlands við því verða tafarlaus og þau munu leiða til afleiðinga sem þið hafið aldrei orðið fyrir í sögunni,“ sagði Pútín í ræðunni.

Jean-Yves Le Drian, utanríkisráðherra Frakklands, gerir ráð fyrir því að með þessum orðum hafi Pútín verið óbeint að hóta notkun kjarnorkuvopna. Þetta kemur fram í viðtali Le Drian við frönsku sjónvarpsstöðina TF1 var Le Drian en þar var hann spurður hvort orð rússneska forsetans væru hótun.

„Já,“ svaraði Le Drian einfaldlega en svo sendi hann Pútín sjálfum skýr skilaboð. „Ég held að Vladimir Pútín verði líka að skilja það að Atlantshafsbandalagið er einnig vopnað kjarnorkuvopnum. Það er allt sem ég hef að segja um þetta mál.“

Vitað er að Bandaríkin, Bretland og Frakkland eigi kjarnorkuvopn en þau ríki eru öll meðlimir í Atlantshafsbandalaginu. Bandaríkin eiga langstærsta hlutann eða um 5.500 stykki. Bretland og Frakkland eiga svo samtals rúmlega 500 kjarnorkuvopn.

Rússland býr yfir meira magni af kjarnorkuvopnum en öll aðildarríki Atlantshafsbandalagsins til samans. Talið er að Rússland eigi yfir 6.200 kjarnorkuvopn í vopnabúrinu.