Það er sjaldgæft að tvíburar eigi ekki sama afmælisdaginn en getur auðvitað komið fyrir. En það er öllu sjaldgæfara að þeir fæðist á sitthvoru árinu. Það gerðist í Kaliforníu nú um áramótin þegar Fatima Madrigal og Robert Trujillo eignuðust tvíbura með 15 mínútna millibili en það dugði til að þeir fæddust á sitthvoru árinu.

Sky News skýrir frá þessu. Fram kemur að Alfredo Antonio Trujillo hafi fæðst klukkan 23.45 á sjúkrahúsi í Kaliforníu. Fimmtán mínútum síðar, þegar klukkan sló á miðnætti, kom systir hans, Aylin Yolanda Trujillo, í heiminn. Alfredo fæddist sem sagt á gamlársdag en Aylin á nýársdag.

Aylin var fyrsta barn ársins á Natividad Medical Center í Monterey County.

Fatima sagði að það væri undarlegt að eiga tvíbura sem eigi sitthvorn afmælisdaginn. „Ég var hissa og ánægð þegar hún fæddist á miðnætti,“ sagði hún.

Tvíburarnir eiga þrjú systkin, tvær systur og bróðir.

Um 120.000 tvíburar fæðast árlega í Bandaríkjunum eða um 3% allra fæðinga. En það er ákaflega sjaldgæft að tvíburar eigi ekki sama afmælisdaginn og talið er að líkurnar á að þeir fæðist á sitthvoru árinu séu 1 á móti tveimur milljónum.