Mikið var um dýrðir í Bridgetown, höfuðborgar Barbados, í nótt þegar nýfengu lýðveldi landsins var fagnað. Frá árinu 1966 hefur Barbados verið sjálfstætt landi en skilgreint sem þingbundið konungsríki. Þjóðhöfðingi landsins hefur síðan verið Elísabet Bretlandsdrottning en í nótt var þeim tengslum slitið með mestu vinsemd þó landið verði áfram hluti af breska samveldinu.
Til marks um það var Karl Bretaprins viðstaddur hátíðarhöldin og færði landsmönnum hins nýja lýðveldis hlýjar kveðjur. Hann fékk einnig afhenta frelsisorðu landsins við hátíðlega athöfn.
Landstjóri Barbados, Sandra Mason, var útnefnd forseti Barbados og þjóðhöfðingi. Hennar fyrsta verk var að útnefna söngkonuna Rihönnu sem þjóðhetju landsins. Söngkonan, sem heitir fullu nafni Robin Rihanna Fenty, fæddist í Barbados árið 1988 en fluttist til Bandaríkjanna þegar hún var 16 ára gömul. Hún hefur haldið góðum tengslum við heimaland sitt á meðan hún hefur verið upptekinn við að syngja sig inn í hjörtu heimsbyggðarinnar allrar.
Hún er í dag ein allra þekktasta og auðugasta söngkona heims og eru eyjaskeggjar í Barbados greinilega afar hreyknir af henni.