Embættismenn hjá bandaríska varnarmálaráðuneytinu hafa tilkynnt að sérstakur rannsóknarhópur verði settur á laggirnar til að rannsaka tilkynningar um flug óþekktra hluta á bannsvæðum. Hópurinn mun rannsaka mál sem sérstök þörf þykir á að rannsaka og leggja mat á hugsanlegar ógnir sem stafa af flugi þessara hluta.

Í júní var birt skýrsla, sem var unnin af bandarískum leyniþjónustustofnunum, um fljúgandi furðuhluti en skýrslunnar hafði verið beðið með mikilli eftirvæntingu. Í henni var varað við að hugsanlega stafi þjóðaröryggi Bandaríkjanna ógn af fljúgandi furðuhlutum.

Yfirmenn úr hernum og frá leyniþjónustustofnunum munu stýra vinnu nýja rannsóknarhópsins sem nefnist „The Airborne Object Identification and Management Synchronization Group.

Hópurinn á að beina sjónum sínum að eyðum í getu leyniþjónustustofnana til að fylgjast með flugi óþekktra hluta og afla gagna um þá.

Fyrrgreind skýrsla var birt að kröfu þingmanna eftir að Bandaríkjaher hafði tilkynnt um fjölda tilvika þar sem óþekktir fljúgandi furðuhlutir höfðu sést á flugi. Fjallað er um 144 slík tilvik í skýrslunni og segist herinn aðeins geta skýrt eitt þeirra.

Varnarmálaráðuneytið, Pentagon, segir að „engar beinar vísbendingar“ hafi komið fram um að þetta hafi verið farartæki frá öðrum plánetum en en útilokar þó ekki að svo sé.

Ákveðnar skýringar voru settar fram í skýrslunni, þar á meðal að hugsanlega væri um háþróaða tækni annarra ríkja að ræða, til dæmis Rússlands eða Kína, eða að um náttúrufyrirbæri væri að ræða.