Í rúmlega eitt ár hefur 27 ára karlmaður frá Herning í Danmörku setið í gæsluvarðhaldi grunaður um umfangsmikil kynferðisbrot. Nú hefur ákæra verið gefin út á hendur honum og er hún í 46 liðum. Hann er meðal annars ákærður fyrir umfangsmikil brot á netinu, nauðgun, blyðgunarsemisbrot og þvingun. Málið er með þeim stærri af þessu tagi sem hafa komið upp í Danmörku og til marks um alvarleikann þá krefst saksóknari þess að maðurinn verði dæmdur til ótímabundinnar vistunar í fangelsi þar sem hann sé svo hættulegur samfélaginu.

Ótímabundin vistun í fangelsi er ein þyngsta refsingin samkvæmt dönskum lögum og þeir sem hljóta slíkan dóm eru ekki látnir lausir fyrr en sérstök nefnd telur það óhætt. Mörg dæmi eru um að fólk losni aldrei úr fangelsi eftir slíkan dóm.

Í fréttatilkynningu frá lögreglunni kemur fram að málið hafi komið upp þegar 19 ára kona kærði manninn í október 2019 fyrir að hafa brotist inn í tölvu hennar og þvingað hana til að gera ákveðna hluti með því að hafa í hótunum við hana. Lögreglan hóf þá rannsókn á málinu sem varð sífellt meira að umfangi. Lögreglan gerði fjölda húsleita og lagði hald á tölvur og tölvubúnað hjá manninum.

Rannsókn málsins hefur verið mjög umfangsmikil og lögreglan hefur farið yfir gríðarlegt magn gagna, þar á meðal myndefni, og haft upp á og rætt við fórnarlömb mannsins. Gríðarlegt magn kynferðislegra ljósmynda fannst hjá manninum og hefur lögreglan borið kennsl á um 500 fórnarlömb. Maðurinn hefur setið í gæsluvarðhaldi síðan í nóvember á síðasta ári.

Maðurinn er ákærður fyrir þvingun, blygðunarsemisbrot, vörslu barnakláms, að hafa brotist inn í tölvur og tölvukerfi, að hafa dreift myndefni sem hann komst yfir við tölvuinnbrot sín og nauðgun.