Nokkrir Íslendingar komu við sögu með sínum liðum í Noregi í dag.
Viðar Ari Jónsson skoraði annað mark Sandefjörd í 2-0 sigri á Stromsgodset í norsku úrvalsdeildinni. Hann lék allan leikinn. Ari Leifsson lék þá allan leikinn með Stromsgodset. Þá kom Valdimar Þór Ingimundarson inn á sem varamaður fyrir liðið þegar um tíu mínútur voru eftir.
Sandefjörd er í tíunda sæti deildarinnar með 29 stig en Stromsgodset er sæti ofar með stigi meira. Bæði lið hafa spilað 24 leiki.
Brynjólfur Andersen Willumsson kom inn á sem varamaður á 69. mínútu í 5-0 tapi Kristiansund gegn Mjöndalen.
Tapið kom töluvert á óvart þar sem Kristiansund er í fimmta sæti deildarinnar með 39 stig en Mjöndalen í næstneðsta sæti með 18 stig.
Loks sat Hólmar Örn Eyjólfsson á varamannabekk Rosenborg allan leikinn í markalausu jafntefli gegn Haugesund á útivelli.
Hólmar og félagar eru í þriðja sæti deildarinnar með 42 stig eftir 24 leiki.
