Það segir Peter Foley, Ástrali, sem hefur stýrt leit áhugafólks að vélinni. Hann segir að fólk gefist einfaldlega ekki upp við leitina að vélinni. Hann stýrði alþjóðlegri leit að vélinni sem ástralska samgöngustofnunin stóð fyrir. Í henni tóku mörg hundruð manns þátt og leituðu að vélinni á rúmlega 120.000 ferkílómetra svæði í sunnanverðu Indlandshafi. Hafsbotninn var kortlagður og reynt var að rekja ferðir þess braks sem fundist hefur. Einnig var unnið að undirbúningi leiðangurs til að ná flaki vélarinnar upp af hafsbotni. En verkefninu var hætt 2017.
The Guardian hefur eftir Foley að vélin muni finnast og að hún muni finnast nærri því svæði í sunnanverðu Indlandshafi sem sjónir leitarmanna beindust að þar til leitinni var hætt 2017. „Þetta er eitt þeirra mála sem mun heilla fólk þar til ráðgátan hefur verið leyst. Þetta er ráðgáta sem verður að leysa og hún mun að lokum verða leyst,“ sagði hann.
Flug MH370 hvarf af ratsjám 38 mínútum eftir flugtak frá Kuala Lumpur í Malasíu en vélin var á leið til Peking í Kína. Gervihnattagögn og ratsjárgögn sýndu að hún var á lofti í sjö klukkustundir eftir að hún hvarf af ratsjám.
Margar samsæriskenningar hafa verið settar fram um örlög vélarinnar. Til dæmis var því velt upp að henni hefði verið rænt af mönnum sem hafi síðan stolið líffærum úr farþegum og áhöfn, að hún hafi lent í svartholi eða að Norður-Kórea hafi átt hlut að máli. Meðal annarra kenninga eru þær að flugmaðurinn eða flugstjórinn hafi framið sjálfsvíg og tekið alla í vélinni með sér í dauðann og að flugmennirnir hafi misst meðvitund og vélin flogið á sjálfstýringu þar til hún varð eldsneytislaus.
