Árið 1996 hófst vinna við geimsjónaukann James Webb en hann á að leysa geimsjónaukann Hubble af hólmi. Verkið hefur dregist á langinn en nú er því loksins að ljúka og hefur bandaríska geimferðastofnunin NASA lokið lokatilraunum sínum og er að undirbúa flutning sjónaukans til Kourou í Frönsku Gíneu en þaðan verður honum skotið á loft.

Þegar vinnan við James Webb sjónaukann hófst var áætlað að kostnaðurinn við gerð hans yrði um 500 milljónir dollara og að hann yrði tilbúinn til notkunar 2007 en verkefnið hefur heldur betur dregist á langinn og kostnaðurinn er kominn í um 10 milljarða dollara.

Sjónaukinn er fullkomnasti geimsjónauki sögunnar.  Honum verður skotið á loft með Ariane 5 geimflaug Evrópsku geimferðastofnunarinnar síðar á þessu ári. Eftir geimskotið mun það taka sjónaukann um mánuð að komast á lokabraut sína en hún verður í um 1,5 milljóna kílómetra fjarlægð frá jörðinni.