Áhugamenn um fornleifafræði gerðu merkan fornleifafund nærri Jelling á Jótlandi í desember á síðasta ári. Þar fundu þeir stóran gullfjársjóð eða um eitt kíló. Fjársjóðurinn samanstendur af skartgripum og var grafinn niður fyrir um 1.500 árum síðan.

Í fréttatilkynningu frá Vejlemuseerne segir að þetta sé einn stærsti, verðmætasti og fallegasti gullfjársjóðurinn sem fundist hefur í Danmörku til þessa.

Fjársjóðurinn var að sögn talsmanna safnsins grafinn í jörðu af auðmanni á járnöld.

Mads Ravn, rannsóknastjóri hjá Vejlemuseerne, segir að þetta sýni að staðurinn hafi verið miðpunktur valds í Danmörku á þessum tíma. Það hafi aðeins verið á færi manna úr efstu lögum samfélagsins að sanka að sér fjársjóði á borð við þennan.

Ekki er vitað af hverju eigandi fjársjóðsins hefur ákveðið að grafa hann í jörðu á sínum tíma.

Fjársjóðurinn verður hluti af stórri víkingasýningu Vejlemuseerne sem opnar 3. febrúar á næsta ári.