Þórhildur Gyða Arnarsdóttir, furðar sig á ummælum Guðna Bergssonar, formanns KSÍ, í Kastljósi í gær þar sem hann sagðist aldrei hafa fengið neina tilkynningu um að landsliðsmaður hafi gerst sekur um kynferðisbrot.

Þekktur landsliðsmaður hafi áreitt hana kynferðislega og ráðist á hana árið 2017 og Guðni Bergs sem og KSÍ hafi verð vel kunnugt um það.

Meint kynferðislegt ofbeldi landsliðsmanna hefur mikið verið í umræðunni síðustu vikur og hefur KSÍ verið sakað um hylmingu og þöggun. KSÍ hafa ítrekað vísað þeim ásökunum á bug.

RÚV greinir frá. 

„Hann grípur sem sagt í klofið á mér. Síðan á sér stað líkamsárás aðeins seinna þar sem hann tekur mig hálstaki í stutta stund, þar sem það skarst annar einstaklingurinn inn í. Ég var með áverka í tvær til þrjár vikur eftir hann.“

Þórhildur fór í kjölfarið og fékk áverkavottorð. Önnur kona sem sami landsliðsmaður braut á þetta umrædda kvöld fór svo með henni að leggja fram kæru.

Rannsókn málsins gekk hægt og endaði faðir Þórhildar á því að senda stjórnarmeðlimum KSÍ tölvupóst og tilkynnti þeim um kæruna. Fékk hann þá svör frá Guðna Bergs sem sagðist taka málinu alvarlega. Guðni hafi svo sett sig í samband við foreldra Þórhildar og tilkynnt þeim að málið myndi hafa afleiðingar fyrir gerandann.

Þórhildur getur ekki séð hvernig í ljósi þessa Guðni geti stigið fram í Kastljósi og haldið því fram að hafa aldrei fengið neina tilkynningu.

Í framhaldinu fékk Þórhildur símtal frá lögmanni KSÍ sem bauð henni á fund og spurði hvort hún væri tilbúin að skrifa undir þagnarskyldusamning og fá þá miskabætur.

Þórhildur afþakkaði það og fékk þá símtal frá öðrum lögmanni sem vildi boða hana á fund þar sem landsliðsmaðurinn vildi biðjast afsökunar.

Landsliðsmaðurinn hafi gengist við brotinu og beðist afsökunar. Í kjölfarið fékk Þórhildur greiddar miskabætur. Hún segist ekkert eiga persónulega við hann að sakast, en það hafi þó komið henni á óvart að sjá þennan leikmann valinn aftur í landsliðið þar sem KSÍ væri meðvitað um mál hennar.

„KSÍ veit af ofbeldinu og velur að vera með gerendur ofbeldis innan sinna raða,“ sagði Þórhildur að lokum.

Guðni sagði í samtali við fréttastofu RÚV í kvöld að honum hafi minnt að brotið gegn Þórhildi væri ekki kynferðisbrot og baðst velvirðingar á ummælum sínum.