Jakob Frímann Magnússon, tónlistar- og athafnamaður, mun skipa efsta sætið á lista Flokks fólksins í Norðausturkjördæmi í alþingiskosningunum í september. Jakob er væntanlega mörgum kunnur en hann stofnaði hljómsveitina Stuðmenn og hefur gegnt margvíslegum trúnaðarstörfum. Hann var meðal annars sendifulltrúi utanríkisþjónustunnar, sat á þingi sem varaþingmaður Samfylkingarinnar, var framkvæmdastjóri miðborgarmála, formaður Félags tónskálda og textahöfunda, formaður STEFs, SAMTÓNS og stjórnarformaður ÚTÓNS og stofnandi Græna hersins.

„Ég hef hrifist af stefnumálum Flokks fólksins þar sem áhersla er lögð á að útrýma fátækt og óréttlæti á Íslandi. Það er sjálfsögð krafa að allir fái lifað mannsæmandi lífi í einu af auðugustu samfélögum heims. Hér á enginn að búa við bág kjör að afloknu ævistarfi, hlúa þarf betur að þeim sem hafa lent í áföllum eða búa við skerta orku og allir eiga að njóta jafnra tækifæra til menntunar og tómstundastarfs. Alvöru velferðarsamfélag byggist á heilbrigðu samhengi milli verðmætasköpunar og mannúðar,“ er haft eftir honum í fréttatilkynningu frá Flokki fólksins.