Danyal Hussein, 19 ára, var í vikunni fundinn sekur um að hafa myrt systurnar Bibaa Henry og Nicole Smallman í júní á síðasta ári. Hann réðst á þær í Wembley í Lundúnum og stakk þær til bana. Fyrir dómi kom fram að Hussein hafi „gert samning við djöfulinn“ um að myrða konur gegn því að hann myndi vinna í lottói.

Fram kom að Hussein hafi heitið djöflinum að „fórna“ að minnsta kosti sex konum á hverjum sex mánuðum. Þetta hafi komið fram í skriflegum samingi sem lögreglan fann. Hann var undirritaður með blóði Hussein.

Lögreglan telur að tilviljun hafi ráðið því að Hussein réðst á systurnar en þær voru með vinum sínum í Fryent Country Park að kvöldi 5. júní til að fagna afmæli Bibaa Henry. Eftir að vinirnir fóru heim urðu systurnar eftir og þá lét Hussein til skara skríða.

Hann stakk þær margoft og dró síðan lík þeirra inn í skóglendi og skildi eftir. Lík þeirra fundust nokkrum dögum síðar eftir mikla leit.

Það voru lífsýni sem komu upp um Hussein en hann skarst þegar hann myrti systurnar og því fannst DNA úr honum á líkum þeirra.

Refsing hans verður ákveðin síðar.