Manchester United og Chelsea vilja fá Declan Rice til félagsins í sumar. Leikmaðurinn hafnaði nýlega tveimur nýjum samningstilboðum frá West Ham að því er segir í frétt Telegraph.
Declan Rice hefur verið í lykilhlutverki í enska landsliðinu undir stjórn Gareth Southgate á Evrópumótinu í knattspyrnu í sumar. Þá átti hann frábært tímabil fyrir West Ham í ensku úrvalsdeildinni.
Rice á enn þrjú ár eftir af samningi hjá West Ham og vill félagið semja við hann til lengri tíma og hækka launin til að fæla hann frá stórliðunum á Englandi.
Leikmaðurinn hefur þó hafnað þessum tilboðum og þegar Manchester United og Chelsea fréttu af því settu þau sig strax í samband við leikmanninn. Manchester City hefur einnig áhuga á Rice en vill bíða þar til næsta sumar þar sem Fernandinho skrifaði undir eins árs framlengingu hjá félaginu.
Manchester United er að leita að varnarsinnuðum miðjumanni til að veita Scott McTominay samkeppni. United telur að klúbburinn hafi ákveðið forskot þar sem Rice er góður vinur Harry Maguire og þá gæti félagið notað Jesse Lingard, sem var á láni hjá West Ham, til þess að lækka kaupverðið.
