Brynjar Ingi Bjarnason, miðvörður KA, var ólíkur sjálfum sér í jafnteflinu gegn FH í Pepsi Max-deildinni í gær. Arnar Grétarsson, þjálfari KA, sagði við Fótbolta.net eftir leik að leikmaðurinn hafi ekki verið alveg rétt stilltur.

Hinn 21 árs gamli Brynjar hefur verið frábær fyrir KA á leiktíðinni. Þá lék hann sína fyrstu A-landsleiki fyrir Íslands hönd í vináttulandsleikjaglugga í kringum síðustu mánaðarmót. Þar spilaði hann mjög vel og skoraði til að mynda mark í leik gegn Póllandi.

Í kjölfarið hefur hann verið orðaður við lið utan úr heimi, til að mynda á Ítalíu og í Rússlandi. Það er tímaspursmál hvenær Brynjar fer í atvinnumennsku.

Hann var þó ekki upp á sitt besta í leiknum gegn FH í gær og fékk til að mynda dæmt á sig víti. Arnar segir sögurnar í kringum leikmanninn greinilega hafa haft áhrif.

„Brynjar er ungur leikmaður sem hefur verið frábær fyrir okkur. Það er mikið að gerast í hausnum á honum við það að yfirgefa okkur. Þú gast alveg séð á hans leik í dag að hann var ekki vel skrúfaður á og ólíkur sjálfum sér. Við getum tekið mörg móment í leiknum þar sem hann á að gera betur, hann tapaði boltanum þegar við fengum á okkur rauða spjaldið. Ég hef oft séð hann meira ‘on’ eins og maður segir,“ sagði Arnar í viðtalinu eftir leik.