Hæstiréttur Singapore dæmdi Gaiyathiri Murugayan nýlega í 30 ára fangelsi fyrir að hafa pyntað og myrt þjónustustúlku sem starfaði hjá henni. Þjónustustúlkan, Piang Ngaih Don, var frá Mjanmar. Murugayan pyntaði hana, barði og svelti í rúmlega ár.

Murugayan játaði sök í málinu í febrúar. Don var 24 ára þegar hún lést 2016 eftir 14 mánaða harðræði.

See Kee Oon, dómari, sagði við dómsuppkvaðninguna að Murugayan, sem er fertug, glími við andleg veikindi en hafi vitað hvað hún var að gera. Hún hafi pyntað og myrt Don af yfirlögðu ráði.

The Guardian segir að verjandi Murugayan hafi sagt að ættingjar Murugayan hafi beðið hann um að sækja um áfrýjunarleyfi í því skyni að fá refsinguna mildaða niður í 15 til 16 ára fangelsi til að Murugayan geti umgengist börn sín þegar hún losnar úr fangelsi.