Það lítur allt út fyrir það að Manchester United nái loksins að fá Jadon Sancho til félagsins í sumar þar sem Pep Guardiola hefur engan áhuga á leikmanninum.

Mikið var rætt og ritað um félagsskipti Sancho frá Dortmund til Manchester United síðasta sumar. Að lokum fór kappinn ekkert og hélt áfram að sýna sig hjá Dortmund. Þrátt fyrir að United hafi ekki hafið samningaviðræður eru allar líkur á að hann komi til þeirra í sumar.

Stjórnarformenn Manchester City hafa hugsað um að reyna að stela Sancho en það mun ekki gerast þar sem Guardiola hefur engan áhuga á því að vinna með leikmanninum.

Pep finnst Sancho frábær leikmaður en það fór illa í hann þegar Sancho sleppti æfingum hjá City þegar hann var að reyna að komast frá félaginu árið 2017 að því er segir í frétt Mirror.

Þegar Sancho var 17 ára hjá City vildi hann fá meiri spilatíma. Þegar hann sá að það var ekki í boði samdi hann við Dortmund. Þar hefur leikmaðurinn spilað 137 leiki og skorað 50 mörk.

Manchester City mun þó græða á sölunni en þeir eiga rétt á 15% af því verði sem Sancho verður keyptur á.