Eðlisfræðingurinn og Nóbelsverðlaunahafinn Frank Wilczek leggur til að nýjar leiðir verði farnar í leitinni að lífi utan jarðarinnar. Hann leggur til að leitað verði að ákveðnum áhrifum sem geimverur hafi á pláneturnar sem þær kunna að búa á.

Í grein í The Wall Street Journal segir Wilczek að þær rúmlega 4.000 fjarplánetur sem við höfum fundið fram að þessu utan sólkerfisins okkar geti hugsanlega hýst líf. Hann segir einnig að hin klassíska aðferð að hlusta eftir merkjasendingum utan úr geimnum dugi ekki til og sé gagnslítil. Hann segir að það sem geti gagnast við þessa leit séu aðallega tvær aðferðir og að með því að nota þær aukist líkurnar á að okkur takist að finna líf á öðrum plánetum ef það er þá til.

Hann leggur til að leitað verði að ummerkjum í efnasamsetningu andrúmslofts pláneta. Líf geti haft áhrif á líffræðileg ferli í andrúmsloftinu eins og eigi sér stað hér á jörðinni og því til stuðnings bendir hann á gatið á ósonlaginu sem er af mannavöldum. Hann bendir einnig á að hugsanlega megi finna tæknibúnað vitsmunavera á braut um plánetur.

Hin leiðin sem hann leggur til er að hitastig fjarpláneta verði rannsakað. Hugsast geti að vitsmunaverur hafi valdið gróðurhúsaáhrifum sem hækka hitastig pláneta. Þessu til stuðnings bendir hann á að ef geimverur eru að fylgjast með jörðinni hafi þær líklega tekið eftir því að magn koltvíildis í andrúmsloftinu hefur aukist sem hefur þær afleiðingar að hitastig hækkar. Á svipaðan hátt getum við að hans mati leitað að slíkum ummerkjum á fjarplánetum.