Áslaug Arna Sigurbjörnsdóttir dómsmálaráðherra telur það ekki hafa verið mistök af hennar hálfu að taka þátt í myndbandinu #Égtrúi. Þetta kemur fram á Vísir.is.

Myndbandið, sem var á vegum hlaðvarpsins Eigin Konur, var birt á miðvikudag en þar stigu nokkrir þjóðþekktir Íslendingar fram og lýstu yfir stuðningi við þolendur ofbeldis.

Edda Falak og Fjóla Sigurðardóttir, þáttastjórnendur Eigin Kvenna,tóku myndbandið niður í gær eftir að konur höfðu sagt þeim að í myndbandinu væru menn sem höfðu farið fyrir mörkin þeirra.

Nú hafa tveir karlmenn, sem tóku þátt í myndbandinu, stigið fram og viðurkennt að þeir hefðu báðir farið yfir mörk kvenna. Þetta eru þeir Magnús Sigurbjörnsson, stafrænn ráðgjafi og bróðir Áslaugar Örnu Sigurbjörnsdóttur dómsmálaráðherra, og Pálmar Ragnarsson, fyrirlesari og rithöfundur,

Myndbandið hefur einnig verið gagnrýnt vegna þátttöku Áslaugar Örnu dómsmálaráðherra. Meðal þeirra sem hafa gagnrýnt Áslaugu Örnu er Sema Erla Serdar, baráttukona fyrir flóttafólk.

Fréttamaður Vísis innir Áslaugu eftir áliti hennar á því að myndbandið hafi verið tekið úr birtingu og svarið er: „Ég hef ekki skoðun á því.“

Þá spyr fréttamaður Vísis ennfremur hvort það sé við hæfi að æðsti yfirmaður dómsmála taki afstöðu með þeim hætti sem Áslaug gerði í myndbandinu, og hún svarar: „Ég tók bara afstöðu með því að styðja þær vinkonur mínar og þolendur sem hafa stigið fram í að segja sína sögu.“

Tveir landsþekktir karlmenn í #ÉgTrúi-myndbandinu viðurkenna að hafa farið yfir mörk – Dómsmálaráðherra harðlega gagnrýndur fyrir sína þátttöku

Þjóðþekktir Íslendingar stíga fram og lýsa yfir stuðningi við þolendur