Samkvæmt frétt Bloomberg þá greiddi fyrirtækið tölvuþrjótunum 5 milljónir dollara fyrir að fá aftur stjórn á leiðslunni. Þeir höfðu lokað henni og kröfðust greiðslu fyrir að opna aftur fyrir eldsneytisstreymi um hana. Þetta tókst þeim með því að lauma spilliforriti inn í tölvukerfi fyrirtækisins. Leiðslan eða net lagna teygir sig frá Texas til New Jersey.
Margir óttuðust að bensínskortur væri yfirvofandi og því hækkaði verð á bensíni mikið og fólk hamstraði bensín. Margar bensínstöðvar urðu uppiskroppa með bensín eða allt að 60% þeirra. Fólk beið klukkustundum saman í röð eftir að komast að bensíndælum.
Alríkislögreglan FBI segir að hópur, sem nefnist Darkside, hafi staðið á bak við árásina. Öryggissérfræðingar á Vesturlöndum segja að um hóp glæpamanna sé að ræða og hafa þeir verið tengdir við Rússland. Joe Biden, forseti, sagði í vikunni að ekki hefðu fundist beinar sannanir fyrir að Rússar hafi staðið á bak við árásina en hann sagði að vísbendingar væru um að hópurinn tengist Rússlandi.
BBC segir að Darkside hafi sent frá sér yfirlýsingu þar sem hópurinn segist „ekki hafa ætlað að valda vandræðum“. „Frá og með deginum í dag munum við skoða öll þau fyrirtæki sem við reynum að ráðast á til að koma í veg fyrir að það hafi samfélagslegar afleiðingar,“ segir í yfirlýsingu Darkside.
Cnet segir að þrátt fyrir að búið sé að opna leiðslurnar geti liðið nokkur tími þar til eldsneytisflæði verði orðið eðlilegt. Bloomberg segir að Colonial Pipeline hafi greitt þrjótunum um 5 milljónir dollara í lausnargjald. Greiðslan er sögð hafa farið fram eftir flóknum leiðum og að hún hafi verið í rafmynt. Bandarísk yfirvöld eru sögð hafa vitað af þessu.
