Fyrrverandi táningsbrúðurin og raunveruleikastjarnan Courtney Stodden segir fyrirsætuna Chrissy Teigen hafa lagt sig í einelti þegar hán var sextán ára og gengið svo langt í einkaskilaboðum að hún hafi hvatt hán til að fremja sjálfsvíg.
Courtney er kynsegin (e. non-binary) og notar fornöfnin hán (e. they/them).
Courtney varð frægt yfir nóttu þegar hán giftist leikaranum Doug Hutchinson í maí 2011. Þá var hán 16 ára og hann 50 ára. Doug er þekktur fyrir hlutverk sitt í kvikmyndinni The Green Mile. Árið 2017 skildu þau á borði og sæng og í janúar í fyrra fengu þau lögskilnað.
Frekar en að fólk reyndi að hjálpa Courtney úr þessu augljóslega furðulega og eitraða sambandi þá var Courtney druslusmánað og gert að athlægi á netinu.
Courtney hefur tjáð sig um hjónabandið og sagt að hán hafi aðeins verið barn þegar hán giftist Doug. „Ég var ekki einu sinni nógu gamalt til að melta hjónabandið. Heilinn var ekki fullþroskaður,“ sagði hán í hlaðvarpsþættinum Dish With Trish. „Ég var misnotað þegar ég var mjög ungt og hafði enga stjórn á því.“
Courtney deildi myndinni sem má sjá hér að neðan og skrifaði með: „Þegar ég horfi á þessa mynd þá líður mér eins og ég hafi verið misnotað.“
Í nýju viðtali við Daily Beast sakar Courtney nokkrar stjörnur um að hafa lagt sig í einelti og sent sér ljót skilaboð á þessum tíma, meðal annars fyrirsætuna Chrissy Teigen.
„Chrissy skrifaði ekki bara færslur um mig á Twitter heldur sendi mér einnig einkaskilaboð og sagði mér að drepa mig. Eins og: „Ég get ekki beðið eftir að þú deyrð,““ segir hán.
Courtney hefur ekki birt einkaskilaboðin en netverjar fundu gamlar Twitter-færslur frá Chrissy sem renna stoðum undir frásögn Courtney.
Courtney segir af öllum stjörnunum sem lögðu hán í einelti og töluðu illa um hán opinberlega þegar hán var aðeins sextán ára, þá hefur aðeins ein manneskja beðið afsökunar, Perez Hilton. Chrissy Teigen hefur ekki tjáð sig um málið.
