Portúgal virðist vera líklegasta landið til að halda úrslitaleik Meistaradeildarinnar þetta árið. Leikurinn átti að fara fram í Istanbul í Tyrklandi en UEFA hefur ákveðið að hætta við það.

Mikið er um COVID-19 smit í Tyrklandi þessa stundina og er landið á rauðum lista Englendinga, sem þýðir að aðdáendur gætu ekki ferðast til landsins.

Þar sem tvö ensk lið eru í úrslitaleiknum, Manchester City og Chelsea, kom upp sú hugmynd að halda leikinn á Wembley en þá þyrftu stuðningsmenn liðanna ekki að ferðast á milli landa. Bresk stjórnvöld hafa þó ekki náð samningi við UEFA þar sem UEFA krefst þess að ýmsir á þeirra vegum komist á leikinn en bresk stjórnvöld eru ekki til í að gera þær undantekningar á sóttvarnarreglum.

Portúgal er á grænum lista stjórnvalda í Bretlandi og er því betri kostur en Tyrkland. Þá telur UEFA að auðveldara væri að semja við stjórnvöld þar um undantekningar frá sóttvarnarreglum. Leikvellir Porto og Lisbon eru taldir líklegastir fari leikurinn fram í landinu.