Ole Gunnar Solskjær stjóri Manchester United segir að það sé ekki hægt að kenna sér um það ef hann stillir ekki upp sínu sterkasta liði gegn Leicester á morgun.

United vann sigur á Aston Villa í gær þar sem allar helstu stjörnur liðsins byrjuðu, liðið mætir svo Leicester á morgun og Liverpool á fimmtudag.

Leikur United við Liverpool var settur inn í dagskrána þessa vikuna eftir að hafa verið frestað fyrir rúmri viku, vegna mótmæla á Old Trafford.

Leicester og Liverpool eru að berjast um Meistaradeildarsæti og ef Solskjær stillir upp varaliði á morgun gæti það haft áhrif á útkomuna í lok móts. „Það er ekki hægt að kenna mér um þegar ég þarf að gera breytingar. Ég verð að gera það, það er ekki öruggt að láta menn spila alla þessa leiki,“ sagði Solskjær.

„Ég væri til í að geta látið þá spila alla leikina en það er ómögulegt. Ég væri að koma leikmönnum í hættu, það er of mikil hætta á meiðslum.“