Guðmundur Andri Tryggvason er mættur í Val en félagið kaupir hann frá Start í Noregi. Þetta var staðfest nú rétt í þessu.

Fram kom í hlaðvarpsþættinum Dr. Football á dögunum að kaupverðið væri nálægt 10 milljónum króna.

Guðmundur Andri er 21 árs gamall kantmaður sem ólst upp hjá KR, hann gekk í raðir Víkings á láni frá Start sumarið 2019 og var frábær í efstu deild karla.

Guðmundur Andri fór aftur til Noregs en hefur ekki tekið þátt í deildarleik með félaginu frá tíma sínum á Íslandi.

Valsmenn vildu bæta við sig kantmanni eftir að Tryggvi Hrafn Haraldsson meiddist en Tryggvi verður frá næstu tvo mánuðina.

Guðmundur Andri er sonur Tryggva Guðmundssonar sem er markahæsti leikmaður í sögu efstu deildar á Íslandi.