Breiðablik tók á móti KR í 1. umferð Pepsi-Max deildar karla í kvöld. Leiknum lauk með 2-0 sigri KR en leikið var á Kópavogsvelli.

KR-ingar byrjuðu leikinn af miklum krafti og áttu hreinlega fyrstu mínútur leiksins, ógnuðu marki Blikana í nokkur skipti á fyrstu tíu mínútunum.

Óskar Örn Hauksson kom síðan KR yfir með bylmingsskoti fyrir utan vítateig Breiðabliks á 11. mínútu og staðan orðin 1-0 fyrir KR.

KR-ingar slökuðu ekkert á eftir fyrsta markið, pressuðu Blikana hátt á vellinum og á 15. mínútu bætti Kennie Chopart við öðru marki liðsins með skoti utan af kanti. Spurningarmerki má setja við Anton Ara í marki Breiðabliks í þessu marki, staðsetning hans var skrýtin og hann virtist í einskismanns landi.

Blikarnir hresstust aðeins eftir þetta annað mark KR þó án þess að ógna almennilega að marki gestanna. KR-ingar héldu að sama skapi sinni ógn áfram og áttu oft á tíðum alltof auðvelt með að þræða sig upp að vítateig Breiðabliks.

Fleiri mörk voru ekki skoruð í fyrri hálfleik og fór KR því með tveggja marka forskot inn í seinni hálfleikinn.

Meira jafnræði var með liðunum í upphafi fyrri hálfleiks. Á 61. mínútu hefði Kristján Flóki Finnbogason getað gert út um vonir Blika í leiknum en hann brenndi af góðu færi í markteig Breiðabliks eftir fyrirgjöf frá Kristni Jónssyni.

Leikurinn var í járnum eftir þetta þar sem að liðin skiptust á að sækja án þess þó að annað mark liti dagsins ljós. Leiknum lauk því með 2-0 sigri KR sem byrja tímabilið af krafti.

Hvað tekur við?

KR tekur á móti KA á föstudaginn næstkomandi. Breiðablik heimsækir Leikni Reykjavík í Breiðholtinu á laugardaginn.