Tveir leikir eru á dagskrá í fyrstu umferð Pepsi-Max deild karla í kvöld. Víkingur Reykjavík fær nýliða deildarinnar Keflavík í heimsókn í Fossvoginn og á Kópavogsvelli fer fram stórleikur umferðar þegar Breiðablik tekur á móti KR.

Breiðablik er af mörgum talið sigurstranglegasta liðið í deildinni í ár og það lið sem flestir spá að geti veitt Íslandsmeisturum Vals samkeppni á tímabilinu um Íslandsmeistaratitilinn.

Blikar fá hins vegar verðugt verkefni í fyrsta leik þegar að KR-ingar mæta í heimsókn, það er alltaf krafa um titil hjá KR sem vill án efa byrja mótið af krafti. Vesturbæjarstórveldinu svokallaða hefur gengið vel á Kópavogsvellinum síðastliðin tvö tímabil. Leik liðanna í fyrra endaði með 2-0 sigri KR og árið þar áður vann KR 2-1 sigur.

Ljóst er að hart verður barist á Kópavogsvelli en leikurinn hefst klukkan 19:15 í kvöld.

Á Víkingsvelli taka heimamenn í Víkingi Reykjavík á móti nýliðum deildarinnar, Keflavík. Ljóst er að um áhugaverðan leik er að ræða en Keflavík mætir til leiks með sterkt lið sem er þvert á hefðina ekki spáð falli, en það er einmitt oftast raunin með nýliða í deildinni.

Leikurinn hefst klukkan 19:15 í kvöld.