UEFA hefur dæmt Ondrej Kudela leikmann Slavía Prag í 10 leikja bann fyrir rasisma í garð Glenn Kamara leikmanns Rangers, atvikið átti sér stað í leik liðanna á dögunum.

Tveir leikmenn Rangers voru reknir út af í leiknum. Á lokamínútunum kom til orðaskaks og átaka á milli Kudela og Kamara og segir sá síðarnefndi að hann hafi verið kallaður „api“ en þar er um tilvísun í hörundslit hans að ræða en hann er þeldökkur.

„Hann kom til mín og sagði að ég væri helvítis api, hann sagði ´Þú ert api og veist það´,“ segir Kamara í viðtali við skoska fjölmiðla.

Kamara réðst að Kudela eftir atvikið og fær þriggja leikja bann fyrir hegðun sína eftir að hafa ráðist að Kudela eftir orð hans.

Kudela hefur nú þegar afplánað einn leik í bann en á níu leiki eftir, hann verður meðal annars fjarverandi í leik liðsins gegn Arsenal í Evrópudeildinni á morgun.