Konan nokkur í Reykjavík leitaði á náðir samfélagsmiðla eftir að líflegar umræður sköpuðust við eldhúsborðið heima hjá henni um hvort Strætóbifreiðar landsins væru í raun gular – eða appelsínugular. Hún segist ómögulega geta verið sammála börnum sínum og spyr því á facebook hvort Strætó sé sannarlega gulur eða appelsínugulur?

Vinir konunnar stökkva til og benda meðal annars á að það sé til litur sem heitir „yellow-orange“ sem sé hugsanlega lausnin á þessu máli.

Umræðurnar leiðast þá fljótt út í að það sé svo margt annað sem haldist í hendur við þetta mál. Er þá „Gula ekkjan“ þá ekki gul ? Er þar verið að vísa í Veuve Clicquot kampavín sem nefnt er eftir ekkjunni frægu Nicole-Barbe Clicquot-Ponsardin. Aðrir benda á að Strætó sé gulur þangað til að hann er hliðin á einhverju sem er sannarlega gult. Þá sé hann appelsínugulur.

DV hafði samband við Guðmund Heiðar Helguson upplýsingafulltrúa Strætó sem segist áður hafa verið spurður út í litinn á Strætóbifreiðum landsins.

„Ég hef fengið skilaboð sérstaklega á facebook þar sem ég er spurður út í litinn. Þetta er greinilega heitt mál. Er þetta ekki eins og með kjólinn, þú sérð þann lit sem þú sérð,“ segir Guðmundur Heiðar og vísar í klassíska umræðu sem má sjá hér.

Hann bendir á að samkvæmt markaðsleiðbeiningunum Strætó og þeim lit sem er tilgreindur þar, sé liturinn gulur. „Ég segi að hann sé gulur. Hann er auðvitað ekki 100% gulur. Það er smá appelsínutónn í honum. Síðan er spurningin hvar eru mörkin á gulum og appelsínugulum?,“ segir Guðmundur – og opnar umræðuna upp á nýtt.