Stjórnvöld á Sri Lanka hyggjast banna búrkur og loka rúmlega 1.000 íslömskum skólum. Þetta eru nýjustu aðgerðir stjórnvalda gegn minnihlutahópi múslima í landinu. Búrka er klæðnaður sem sumar múslímskar konur klæðast en hann hylur allan líkamanna, þar á meðal andlitið.

CNN segir að Sarath Weerasekera, ráðherra öryggismála, hafi nýlega skrifað undir tillögu til ríkisstjórnarinnar um að banna búrkur af „þjóðaröryggisástæðum“. „Áður fyrr klæddust múslímskar konur og stúlkur aldrei búrkum. Þetta er merki um trúarlega öfgahyggju sem er nýtilkomin. Við ætlum alveg örugglega að banna þetta,“ sagði hann á ráðstefnu um síðustu helgi.

Meirihluti landsmanna er Búddatrúar. Notkun búrkna var bönnuð tímabundið 2019 eftir að hryðjuverkamenn drápu rúmlega 270 manns á páskadag í árásum á hótel og kirkjur. Leyniþjónusta landsins sagði að öfgasinnaðir múslimar, með tengsl við Íslamska ríkið, hefðu staðið á bak við árásirnar.